ازاى اتعامل مع خطيبى ، فترة الخطوبة ، موضوع للآنسات

اهلا ومرحبا بكل الانسات الجميلات ، زوار مدونة زينه الاعزاء ، نقدم لكم اليوم موضوع هام وحيوى وويشغل بال كل بنوته جميله مقبله على فترة خطوبة او حديثة الخطبه ، وهو طريقة التعامل مع الخطيب او الزوج المستقبلى ان شاء الله . 




تعالى بقى نتكلم عموما ونبدأ من تانى ومن اول ونضيف :) 


هنتكلم عن انواع العرسان و وفى بداية الخطوبة 

فى بداية الخطوبة


بصى احنا حنتبدى من الأول خالص
فى بداية الخطوبة
بتبقى المكالمات كتير وتلاقيه كل شوية يتصل بيكى واهتمام زايد وانتى فين وفين عقبال ماتتصلى بيه
وتتكلموا وتتعرفوا وتخلصوا الكلام وهو بكده بيبقى عرف عنك معظم الحاجات يعنى بتحبى ايه بتفكرى ازاى
طموحاتك وهكذا بيخلص الكلام

تيجى يعدى كام شهر من الخطوبة تتدخلوا فى حالة الملل مش بتلاقوا كلام تقوله انتم الاتنين
مش بيتصل بية زى الأول
يقولى هتصل ومش بيتصل
بيفضل سهران مع صحابه وانا ولا على باله
شغال لليل ونهار وفين وفين عقبال مايعبرنى
مش ده يا بنات اللى بيحصل

نندخل على نقطة نقطة
1-مش بيتصل زى الأول ده طبيعى يا بنات انتى لما تبقى حابة أكلة معينة وبتموتى فيها مش هيبقى نفسك تأكليها كل يوم
ولما خلاص عرفتى طعمها واخدتى عليه مش بتقللى منها بس بتأكليها
هما نفس الحكاية بتبقى انتى جديدة عليه ولازم يحببك فيه وهو كمان يحبك علشان كده الاهتمام بيبقى زايد الفترة الأولى
وبعد كده بتتدخلوا فى الجد فلازم تكبرى دماغى ومتعلقيش على حكاية المكالمات دى اتصل مرة ويكون حلو فى الكلام معاكى زى عشرة مرات

2-فى خطاب يقولولك شوية وهتصل انا بيكى ويرجع ميتصلش وانتى ياعينى قاعدة مستنياه وحاطة ايدك على خدك مستنية الفرج
صح مش ده اللى بيحصل انا بتحصل معاية وببقى حنفجر منه بس بقيت اكبر دماغى ويقول يتصل وميتصلش عادى
ومش لازم لما يتصل كنت فين دانا قاعدة مستنياك كبرى وعيشى اللحظة زى مابيقولوا


3-شغال لليل ونهار وفين وفين عقبال مايعبرنى
دى يا بنات المفروض نقدر ظروفهم وظروف البلد الصعبة وان عليهم مشاغل وهموم وضغوط
منجيش يابنات نزودها عليهم اكتر اشغلى انتى كمان اشغلى نفسك بحاجة

4- سهران مع صحابه سبيه ياستى سهران ويعمل اللى هو عايزه وطبعا فى حدود الأدب والاصول
ومتمسكيش فى كل حاجة

ماشى اتفقنا فى النقط دى
يبقى مش كل شوية رنات رنات رنات انتى لو مكانه حتزهقى
مش كل شوية تتصلى اتصلى علشان المهم ومرة تتطمنى عليه
وخليه يحس باهتمامك بيه مثلا تصحيه يروح الشغل تسأليه أكل ولا لسة كده يابنات فهمتوا

جددى من نفسك

بصوا يابنات

عايزين نخرج من حالة الملل اللى احنا فيها تعملوا ايه

طبعا كلنا عايزين نجدد من نفسنا هقولكم ازاى بصوا يا بنات

اول حاجة غيرى من طريقة لبسك يعنى جددى من نفسك وطبعا اللى امكانياتها تنفع تشترى لبس جديد

واللى ظروفها مش سامحة علشان الجهاز وكده يبقى مثلا عندك طقم جيبة وبدى ممكن توفقى البدى على جيبة تانية
وهكذا وطبعا العناية بنفسنا
يعنى الشعر فى الوش يتشال قبل ماخطيبك يجئ ولو فى ايدك تشيليه ولو انتى مكتوب كتابك اهتمى بشعرك قدامه
بدل مايتسرع ويتخض
والاسنان طبعا تتغسل علشان الضحكة تكون كويسة وياريت يبقى معاكى كلورتس ده مستيكة بيخلى ريحة الفم كويسة
وطبعا هدومك لازم تكون مكوية مش كانها طالعة من الخلاط وياريت المكياج يكون خفيف يعنى انا بكتفى بالكحل والروج الشفاف
وريحة العرق يا بنات اسهل حل والحل الأمان ليكى الليمون بيقضى على ريحة العرق جربوه وادعولى
ويكون البيت متروق وكل حاجة تمام علشان البيت ومنظر البنوتة ورقيقتها وضحكتها هى عنوانك

نيجى بقى بالنسبة للتليفونات
اللى مش بيلاقى حاجة يتكلم فيها
طبعا فى الأول سلامات وبعد كده اسألوا بعض يوم كل واحد كان عامل ازاى
ولو خلصتوا الكلام ممكن تلعبوا لعبة الصراحة وما ادراكى ما الصراحة
بس محدش يزعل من الصراحة

ماشى ممكن تلعبوا لعبة الحروف الابجدية يعنى تقولى حرف ويجيبى جملة على الحرف ده

تمام ادينا لعبنا وخلصنا حنستفاد من ده كله ايه ان هو على الاقل ضحكتم مع بعض طلعتم من حالة الملل اللى انتم عايشين فيها
نوع من التجديد

خليه كل مايجئ عندك يعرف ان الضحك والسعادة عندك انتى يعنى اضحكى وهزرى وخليكى بنوتة رقيقة
وخليكى مهتمة بيه بمشاكله بحاله فى الشغل
خليكى انتى فى حنية مامته ودلع اخته عليه وبنوتة الصغيرة خليه يتجن عليكى
خليه يعرف ان انتى مفيش زيك اتنين

شوفى بيحب أكلة ايه وفجايه بيها حيفرح بيها أوى مش علشان الأكلة علشان انتى عاملها علشان هو بيحبها
يعنى انتى بتعملى كل حاجة علشان بتحبيه وعايزة ترضيه

اتفقنا ولو فى حاجة مضايقكى منه مش لازم العصبية والخنقة وكل ده استنى الوقت التمام ويكون رايق
وقوليله ان انا زعلانة منك ياحبيبى حيقولك ليه وهيصالحلك
اما لو انتى متعصبة اعرفى ان حقك حيضيع وهيقلب عليكى الترابيزة
ياريت يا بنات نختار اوقاتنا والاوقات اللى نتكلم فيها 
 

 

الحماوات



نبتدى ونقول فى البداية خالص اعتبريها أمك التانية حتى لو كانت شبه مريم منيب علشان نبقوا متفقين

ولو كانت بتعاملك وحش عامليها انتى بالحسنى

نبتدى من الأول خالص اللى مخطوبة جديدة

بصى ياقمر عايزة تكسبى خطيبك لازم تكسبى حماتك الأول وهو هيفرح أوى انك اهله كلهم بيحبوكى
واعرف ان طالما حماتك حبتك يبقى

اهله كلهم هيحبوكى
وخطيبك حيبقى مستريح
وهيبقى ليكى عين جوه البيت
وحتلاقى كمان ان هى ممكن تدافع عنك لو خطيبك مزعلك

حنرضيها ازاى
1- تتصلى بيها تسألى عليها يعنى ممكن تكلميها مرتين فى الأسبوع ونوع تانى يابنات حماتها بتحب الكلام الكتير يعنى عايزة الكلام كل يوم خلاص طالما بنحب كده راضيها وابو بلاش كتر منه بس خير الكلام ماقل ودل

2- تانى حاجة روحى زوريها من وقت للتانى وخدى حاجة حلوة معاكى وحتفرح أوى بيها وممكن تسألى خطيبك هى بتحب ايه
3- لو كانت تعبانة طبعا لازم تروحيلها واسألى كل شوية عليها وقوليلها ياماما لو احتاجتى حاجة كلمينى مش انا بنتك كلى بعلقها حلاوة ومفيش اسهل من الكلام
4- امدحى فيها قدام خطيبك عارفة ليه علشان خطيبك حيفرح بكلامك وحيروح يقولها وهتبقى طايرة من الفرحة اسالى مجرب
نصيحة يابنات متعمليش حاجة وتستنى المقابل اعملى وخلى نيتك لربنا
علشان متتعبيش ومتقوليش انا بكلمها وهى لا أنا بزورها وهى لا احنا قولنا حنعمل علشان ربنا وبعد كده خطيبك


بالنسبة لموضوع غيرة الحماوات مننا بصى يابنوتة منك ليها
لو انتى عندك ابنك وحسيتى ان ابنك حيحب واحدة اكتر منك مش حتغيرى منها وحتبقى مش طايقها
بس لوانتى كسبيتها وعاملتيها كويسة وكسبتى ودها من الأول حتحبك زى ابنها

أما بالنسبة بقى اللى مش نافع معاهم العجب ولا الصيام فى رجب ومولعين صوابع العشر شمع ليهم

وبرضه مش عاجب

نعمل ايه بصى ياقمر لو حتقدرى تستحملى استحملى وعامليها برضه عامليها بالحسنى
علشان خاطر ربنا وبعد كده خطيبك لاجل الورد بينسقى العوليل

لو المشاكل زادت يبقى تفاديها وابعدى عنها خالص علشان مهما كنتى على حق
عمر ماخطيبك هيجى على امه علشانك يبقى ماتحاوليش تحطى نفسك فى مقارنة معاهم
واللى مالوش خير فى اهله مش حيبقى خير فيكى

وحاولى تصلى استخارة كتيرة وتدعى ربنا يهديها عليكى متتدعيش بغير كده علشان انا عارفة اللى بيدعوا غير كده
اما بالنسبة لاخواته البنات صاحبيهم وخليها صاحبتك بس نصيحة منى اوعى تحكيلها حاجة عنك انتى وخطيبك

ومتقولهاش خطيبى جبلى ولا خطيبك عمل ولا خطيبك سوى علشان هى لو مش مخطوبة حتغير منك وحتتضايق

وممكن تطلب طلبات كتير من خطيبك وتوقع مابينكم وخلى خطيبك ميحكيش حاجة تخصكم انتم الاتنين لحد وبذات لو زعل

لا تعانديهم واتقي شرهم وحاولي ان تقللي الاحتكاك معهم




الرجل العصبى


علشان انا بعانى من نفس المشكلة بس الحب ولع فى الذرة يابت وعلشان كده المفروض نستحمل  
بصى ياقمر منك ليها لو خطيبك من النوع ده لازم تتجنبى اى حاجة منه مثلا لو بيتعصب من هزارك مع حد تتجنبى الحكاية دى
لو قالك متتكلميش مع ده او ده تتجنبى علشان الراجل العصبى بيبقى غيور اوى كمان وبيغيرته ممكن يتعصب عليكى

وهتيجى على دماغك انتى

بصى بقى يا شابة منك ليها بتتكلموا عادى زى ما بتتكلموا هتلاقيه هيتعصب تسيبه خالص يقول اللى هو عايزه

ومتتكلميش خالص حتى لو الكلام حيزعلك ليه بقى

علشان لو اتكلمتى هيقلب الغلط عليكى انتى بمعنى هتكونى انتى الغلطانة يعنى ولا تتعصبى ولا تتكلمى خليكى باردة

وحطى اعصابك فى تلاجة ده حل

والحل التانى ان انتى ممكن تقوليله يا حبيبى لما تهدى نبقى نتكلم او تقولى اى حجة تانية مثلا ماما بتنادى علية

المهم انك تقفلى معاه وخلاص علشان تتفادى المشكلة اللى جاية

بعد كده لما يهدى تبقوا تتكلموا براحتكم بس اهم حاجة تتفادى وقت عصبيته

1- متعليش صوتك ومتزعقيش
2- متتعصبيش عليه
3- متتناقشيش مع كتير وهو متعصب
4- لو سمعتى كلمة زعلتك ولا كأنك سمعتى حاجة استنى لحد ما يهدى خالص وبعد كده نأخد حقنا
زى مابيقولوا منتطرقش على الحديد وهو سخن


دى وهو متعصب


الصراحة

لو الصراحة مبنية مابينكم حترتاحوا اوى وبمعنى الأدق الوضوح
الوضوح فى العلاقة يعنى ان انتم متخبوش حاجة على بعض
بس مش معنى كلامى ان كل حاجة تقوليها
اكيد فهمتوا انا قصدى ايه واللى مش فاهم يقولى وانا هافهمه
وكمان لو خطيبك صارحك بحاجة متعلقيش المشنقة وانت عملت كده ليه وازاى
والكلام ده حتى لو اضايقتى احترمى صارحته وان هو قالك بدل ماكان خبئ عليكى كنتى حتزعلى اكتر
أقل كلمة قوليله انا احترمت صارحتك معاية وياريت متعملش كده تانى يعنى تأكليه بالكلام
بدل ماتخليه يندم ان هو قالك


عينه زايغه


نتكلم عن اللى خطيبها بتاع بنات واللى خطيبها عينه زايغة واللى خطيبها معاه بنات فى الشغل واللى ضايف بنات على الفيس

حنبتدى بحاجة حاجة
1-اللى خطيبها بتاع بنات
بصى ياقمر منك ليها لو خطيبك كان قبل مايعرفك كان بتاع بنات وبيعرف بنات كتير حطى تحت قبل مايعرفك 100 خط وخلاص تاب علي ايدك
مالكيش انك تزعلى منه او تعاتبيه وخلاص تنسى الحكاية دى وكأنها محصلتش وتحترمى ان هو قالك بدل ماكنتى تعرفى من برة

اما بقى لو انتى مخطوباله وبيعرف بنات عليكى فبقولك ده شخص حتتعبى معاه أوى فى حياتك وحتفضلى شاكة فيه
وفكل حركاته

ولاى بنوتة علشان خطيبها متخلهوش يبص برة خليكى مهتمية بنفسك وعندك ثقة فى نفسك علشان الراجل بيحب البنت الواثقة من نفسها
وابعدى عن الزعل والخناق والعكننة كل شئ علشان ميحاولش حتى يبص لبرة


2-اللى خطيبها عينه زايغة اللى تبقى ماشية جنب خطيبها وتلاقيه بيبص هنا وهنا بصى فى رجالة بتبقى قصدة انك تشوفيها
علشان تحس بغيرتك عليها
وفى رجالة بتبقى عايزة تغزيلها عينها صح كلامى ولا لا
الحل ايه بقى انك فى الأول تعدى وتعملى نفسك مش أخدة بالك حتقولولى ازاى هقولك يمكن نظرة أولى وظلمينوه
المرة التانية لاقتيه بيص قوليله على فكرة مش حلوة أنا أحلى منها ولو بصيت تانى على حد أنا هزعل منك انت ترضى أبقى ماشية جنبك وأبص على حد تانى
هيقولك لا طبعا هتقوليله اللى مترضهوش علي نفسك مترضهوش على حد
المرة الثالثة بقى واظن ان هى مش حيبقى فيها مرة ثالثة بس الاحتياطى واجب ( ازعلى منه وعلى الموقف ده وساعتها هيجى يصالحك وهيراضيكى
ومش حيعمل كده تانى بس متتعصبيش ولا تتخلقى عليه )

3- البنات اللى مع خطيبك فى الشغل
بصى انتى لو واثقة منه وعطيتهاله الثقة يبقى متقلقيش عليه لو هو لوحده فى أوضة مع 100بنت طالما انتى واثقة فيه
هتقولولى يا ريرى البنات هما اللى ميتوثقش فيهم هقولك طالما خطيبك محترم وبيحبك وبيصونك فى غيابك يبقى مهما عملوا
متقلقيش

4- اللى ضايف بنات على الفيس بصوا أنا بعمل ايه انا بدخل على الفيس عنده ولو لاقيت بنت عنده بمسح على طول
من غيره ما اقوله
ماشى لو تقدرى تمسحيهم من غير مايعرف امسحيهم
ولو متقدريش فى ساعة روقان اطلبى منه ان هو يمسح البنات لو قالك ليه ومش ليه قوليله علشان بيغير عليك
حتلاقيه حيعند ويتعصب قوليله خلاص براحتك انا واثقة فيك وأنا عارفة انك قد الثقة دى
حتلاقيه بيهدى لوحده ولما يلاقيك كده ممكن يمسحهم لوحده

انا كده خلصت الجزء ده ولو اى واحدة عندها أى سؤال انا موجودة وهاجاوب عليها

  الراجل المتحكم 

ندخل على الراجل المتحكم
الراجل بطبيعته لما بيحب حد أوى بيبقى عايزه له هو لوحده مش عايز حد يشاركه فى الحاجة اللى بيحبها

علشان كده بتلاقيه يمنعك من كل حاجة من الخروج من الكلام فى التليفون من الهزار مع قرايبك

وده بيحصل معانا صح وعلى فكرة يابنات دى مش قلة ثقة ولا حاجة ولا حتى شك

ده خوف عليكى من اللى بيحصل فى البلد ومن الشباب ومن كل حاجة

اول حاجة حنتفق ان أى خطيبك مش بيبقى له حكم على خطبيته علشان هى فى حكم باباها وفى بيته
مش فى بيت خطيبك علشان كده مالوش حكم ان هو يقولى رايحة فين وجاية منين وتنزلى ولا لا

1-دى اول فكرة لازم تعرفها اللى فى بداية الخطوبة ان انا بعرفك ان انا رايحة المكان المعين
مش باخد اذنك بس بطريقة أحسن
2- لو هو بيقولك لا متروحيش ولا متجيش اللى طبعا عدى على خطوبتهم شهور لازم تعرفى واجهة نظره
ان هو مش عايزك تروحى ليه ولو صح نفذى رغبته ولو غلط حاولى تتناقشى معاه وتفهميه الصح
بس متقولوش انت مالكش حكم علية حاولى ياقمر تختارى الالفاظ المناسبة علشان تكسبى الشخص اللى قدامك

وبطبيعة الراجل بيحب يعود خطيبته على اسلوبه فى بيت باباها علشان لما يتجوزوا تبقى عارفة
هو بيحب ايه ومش بيحب ايه

مثلا معظم الرجال متفقين ان مش بيحبوا
البنت اللى بتنزل عمال على بطال ده فى نوع من الرجالة كده
وفى اللى خطيبها مش بيحبها تبات برة بيتها
وفى خطيبها اللى مش بيحبها تشتغل
وفى واحدة خطيبها لازم تعرفه هى رايحة فين وجاية منين

بصوا يابنات فى كل دول بيحب يحس برجولته وان انتى بتسمعى كلامه وبتقدريه وبتحبيه
على فكرة مش سى السيد ولا حاجة بس دى غريزة فى الراجل
واهم حاجة فى التعامل انكم تكون متفاهمين يعنى مش شخص واحد بس بيفرض رأيه
علشان الحب مشاركة بين طرفين

يبقى اتفقنا مش علشان هو بيقولك متروحيش متجيش يبقى هو متحكم هما بيبقوا خايفين علينا من اللى بيحصل فى البلد
وبيبقى دليل على حبه الشديد ليكى وخوفه عليكى
وابعدى عن اسلوب العند معاه خالص مش معنى كده ان انا بقول ان احنا نلغى شخصيتنا لا بس منعندش معاهم

عارفين انا خطيبى مكنش عايزنى اروح لصحابتى عارفين قولتله ايه خلاص اللى انت شايفه ولاقيته اتصل بية
بعدها بشوية قالى روحيلها بس متتأخريش

يعنى اللى أنا اقصده بذكاء المرأة ممكن تأخدى أى حاجة انتى عايزاه منه


الرجل المدخن

فى بداية احب افكركم ان مفيش حاجة بتيجى بالزن او العصبية

بس كل واحدة وعلى حسب زنها واحدة تقدر توصل الزن امر من السحر
وواحدة تخليه يعند اكتر ويقول والله مانا مبطل بالعند فيها


يبقى اللى عايزين نفهمه بالاسلوب الحلو وبذكاء البنوتة حتعرف تأخد اللى هى عايزاه

بصوا بقى معاية وركزوا السجاير والتدخين عامل زى الادمان بس طبعا مخاطره اقل من ادمان حاجة تانية
وقصدى بالادمان هو التعود على فعل شئ معين
واى واحدة مخطوبة جديد وخطيبها بيدخن لو حتقدر تستحمل الوضع ده توافق على الوضع ده بس حتعرف ان هى حتتعب معاه
بصوا يابنات انا خطيبى الاول كان بيدخن بالعلبتين فى اليوم قبل مايعرفنى اتفقت معاه ان هو مش حيشرب سجاير
ووافق وقعد كام شهر ميشربش وانا كنت متأكدة من كده ومرة شوفته بالصدفة وهو بيشرب عارفين انا ايه اللى زعلنى
انا هو عمل حاجة من وراية علشان انا كنت بزعق وبتعصب

عارفين انا بقولكم كده ليه علشان حتفضلوا تزعقوا وتتعصبوا مش حينوبكم غير لقب نكد وعكننة
وحيعمل كل حاجة من وراكى

يبقى نتفق ان احنا حنطول بالنا معاه ونحط كمان اعصابنا فى تلاجة
ماشى بعد كده خديه بالهداوة وقوليله ياحبيبى السجاير مضرة بالصحة
وقوليله انا خايفة على صحتك وياسيدى متبطلهاش على طول وواحدة واحدة
عامليه زى الطفل
قوليله مثلا 3 مرات فى اليوم وكل اسبوع مثلا نقللها خالص وخليه يأكل فاكهة عوضا عن السجاير
هاتيله كراميل ولب يأكله وهو قاعد علشان يستغنى عن السجاير وهكذا

ويا سلام بقى للمتجوزين حيبقى تحت عينكى وانتى اللى حتبقى عارفة خط سيره

يبقى اهم حاجة طولة البال والهداوة وبكلمتين حلوين وتحسسيه بأنك خايفة عليه
حتقولولى عملنا كل ده ومفيش فايدة مبطلهاش ة
هقولكم بس على الاقل بطلها شوية بدل ماكان بيشرب علبة حيشرب 3 او 4
يبقى كده احسن ولالا انتم رأيكم ايه


ازاى تخليه يهتم بيكى , الاهتمام


حنتكلم عن الاهتمام وان احنا نطلب حاجة بس بالذوق ونبعد عن العكننة
بس على فكرة الاهتمام مش بيجئ بالطلب عمر ماحنروح نقول لحد اهتم بينا اانا عجبتنى اوى المقولة دى علشان هى صح

كل شىء يمكن ان يأتى بالطلب الا الاهتمام فأذا جاء بعد الطلب فلا قيمة لة

لان اى مشاعر جميلة تطلب تفقد قيمتها ومعناها لانها يجب ان تكون تلقائية ومن القلب

يعنى مينفعش اروح اطلب ان هو يهتم بية بس احسسه ان هو مهمل فية علشان كده انتى عايزة اهتمام منه

بس مش حتطلبيه بشكل تلقائى يعنى مثلا لو انتى زعلانة من حاجة معينة حسسيه من نبرة صوتك
وهو اول ما حيحس حيفضل جنبك
عارفة اكتر حاجة تحسى بيها ان خطيبك حاسس بيكى ان هو يعرف نبرة صوتك يعنى يبقى فاهم نبرة صوتك وانتى فرحانة وانتى زعلانة لما
بتتضايقى منه بتتبقوا فاهمين بعض وهكذا
اما بقى اهتمامك بيه بصوا يا بنات خير الامور الوسط يعنى منخليش اهتمامك بيه ان انتى تتصلى بيه كل ربع ساعة
ده مش اهتمام
الاهتمام بمعنى ان مثلا تتصلى بيه لو حتى مرة فى اليوم بس يحس قد ايه انك مهتمية بيه
بأنك تسأليه على الشغل وعن الصلاة ان هو أكل ولا لا حسسيه ان انتى يهمك امره

ولازم يا بنات تراعوا ظروف شغل خطيبك والضغوط اللى عليه حتى لو قصر معاكى فى حاجة

اما بقى لو انتى عايزة تتطلبى منه حاجة بس بالطريقة كويسة
بصى تستنى الوقت اللى يكون رايق فيه وتحسى ان هو مش حيقول لالا على اى طلب
وبعد كده تقوليله ممكن يا حبيبى اطلب منك طلب حيقولك امرى واطلبى بقى اللى انتى عايزاه
بس ياريت يكون طلب واحد مش ماتصدقى بقى وتبقى مأسورة وانفجرت طلبات


الثقه بالنفس


علشان نبقوا متفقين طول مانتى واثقة من نفسك يبقى ان شاء الله مفيش حاجة حتضايقك

بصوا يابنات
الحمد لله ربنا خلقنا كلنا اشكال مختلفة ومفيش حد وحش كلنا حلوين ولو كان فينا عيب بس برضه حلوين
يعنى متجيش تقوليلى اصل انا وشى فى حب شباب فى هالات سوداء فى نمش
كل داء وله علاج بس برضه مش حنبقى وحشين
وعلى فكرة الجمال جمال الروح وطول مانتى من جواكى حلوة وبتتمنى الخير لكل الناس
الناس كلها حتحبك حتى لو متعرفكيش مسمعتوش عن الحب من أول نظره
وفى ناس أول ماتبصلها بتستريحلها
صح كلامى ولا حد معترض

انا هدفى من المشاركة دى طول مانتى واثقة فى ربنا
ربنا عمره ما حيخذلك ابدا

يعنى فى واحدة خطيبها وسيم واحلى منها وعينه خضراء وشعره اصفر وشكله قالب على الواد مهند
وانتى اقل منه فى الجمال والواد واثق فى نفسه والكلام ده
تفتكرى هو خطبك ليه مش علشان بيحبك مبصش لشكلك ولا لجمالك ولا مين احلى من مين اكيد شده ليكى حاجة معينة
زى اخلاقك وتربيتك وسمعتك الكويسة انتى واهلك
وانا قولت قبل كده الراجل حتى لو عينه زايغة يبقى ماحيفكر يخطب واحدة حيخطبها لاخلاقها مش لجمالها
يبقى اهم حاجة انتى تبقى واثقة فى نفسك متقوليش لا هو حيبص برة لواحدة احلى منى وزيه فى الحلاوة

كان فى نكتة بتقول المخدة مش بتشيل اتنين حلوين وان شالت بيتطلقوا
بعد الشر علينا من الطلاق

واللى لسة مش مخطوبة
او فيكى عيب زى اللى قولت عليهم فوق تفتكرى ان انتى مش حتتخطبى وتتجوزى
ثقى فى ربنا وان كل واحد مكتوبله نصيبه وهو بطن امه وكل واحدة ليها يوم وحتتجوز
اهم حاجة تثقى فى نفسك بس طبعا الثقة الزايدة لا علشان ميبقاش تكبر وللعياذ بالله
ومتقلش علشان محدش يحس انك ضعيفة وبأقل كلمة تهزك
وطول مانتى شايفة نفسك جميلة كله حيشوفك بعينيك انتى
والراجل دايما بيحب البنت اللى تكون واثقة من نفسها مش دايما شكاكة فى نفسها
ومتبقاش عارفة تأخد قرار لوحدها
 
 
بتمنى من كل قبلى ان يكون الموضوع مفيد وشيق ، ومليان بالمعلومات اللى تخليكى يا بنوته دايما سعيدة 
تابعونى دايما على مدونة زينه 
 

يتم التشغيل بواسطة Blogger.